बैतडी -बैतडीको पञ्चेश्वर गाउँपालिका ४ का १४ वर्षीय बालक हराएको एक महिनापछि मृत फेला परेका छन् । मानसिक अवस्था ठिक नभएको भनिएका १४ वर्षीय रमेश भट्ट सोमबार दिउँसो मृत फेला परेका हुन् । पञ्चेश्वर ३को मडवल्या खोलाको खानेपानी ट्यांकी नजिक भट्टको शव फेला परेको स्थानीयहरुले बताएका छन् । भट्टको शव क्षतबिक्षत अवस्थामा भेटिएको बताइएको छ ।
प्रहरीलाई आफन्तहरुले हराएको भन्दै गत साउनमै निवेदन दिएको भएपनि भेटिन सकेका थिएनन् । मृत फेला परेको अवस्थामा पनि प्रहरीलाई यसबारे कुनै जानकारी नभएको बताइएको छ ।
भट्टको मृत्यु कसरी भएको हो भन्ने बारे कुनै विवरण खुल्न सकेको छैन ।
