काठमाडौँ —एसियाली फुटबल महासंघले दशरथ रंगशालामा अन्तर्राष्ट्रिय फुटबल खेल खेलाउनका लागि अनुमति दिएको छ । अखिल नेपाल फुटबल संघ (एन्फा) लाई एएफसीले दशरथ रंगशालामा अन्तर्राष्ट्रिय खेल खेलाउन योग्य रहेको रिपोर्ट दिएको छ ।
विश्वकप छनोट खेलका क्रममा एएफसीले दशरथ रंगशालामा अन्तर्राष्ट्रिय स्तरको फुटबल खेल आयोजना गर्न अयोग्य भएको जनाएको थियो । एएफसीले रंगशालालाई अन्तर्राष्ट्रिय खेलका लागि अयोग्य गरेपछि चैत महिनाबाट राष्ट्रिय खेलकुद परिषद् आफैंले मैदानको रेखदेख र संरक्षण सुरु गरेको थियो ।
यही साउन ९ गते एएफसीका प्रतिनिधि दशरथ रंगशालाको निरीक्षण तथा अवलोकनमा आएका थिए । एएफसी प्रतिनिधिले रंगशालामा अहिले मापदण्ड पूरा भएको प्रतिवेदन दिएको राखेपले जनाएको छ ।
दशरथ रंगशालामा अब यही साउन २९ गते एएफसी च्यालेन्ज लिगअन्तर्गत प्रारम्भिक खेल हुनेछ । त्यसमा भुटानको पारो एफसी र नेपालको चर्च ब्वाइज युनाइटेडबीच प्रतिस्पर्धा हुनेछ ।
रंगशालामा अन्तर्राष्ट्रिय खेल खेलाउन अयोग्य भएको एएफसीले गत चैतमा प्रतिवेदन दिएपछि २०८० चैत ८ मा नेपालमा हुनुपर्ने विश्वकप छनोटअन्तर्गत दोस्रो चरणको नेपाल र बहराइनबीचको खेल बहराइनमै भएको थियो भने जेठ २४ मा यूएईसँगको खेल साउदी अरेबियामा खेलेको थियो ।
