कञ्चनपुरः कञ्चनपुरबाट ३ जना पुरुष लागूऔषध र २ जना महिला चरेशसहित पक्राउ परेका छन्।
जिल्लाको भीमदत्त नगरपालिका–४ बसपार्कबाट ६० मिलिग्राम लागूऔषध खैरो हेरोईनसहित झापा जिल्लाको अर्जुनधारा नगरपालिका–९ खर्बन्दी घर भई हाल कञ्चनपुरको भीमदत्त नगरपालिका–८ तिलाचौर स्थित सुन, चाँदी पसलमा कालिगडको काम गर्ने ३६ वर्षीय मानबिर बिश्वकर्मा पक्राउ परेका हुन्। बिश्वकर्मालाई शुक्रवार दिउँसो अस्थायी प्रहरी बिट बसपार्क, कञ्चनपुरबाट खटिएको प्रहरी टोलीले पक्राउ गरेको हो।
यसैगरी भीमदत्त नगरपालिका–४ गल्ली नम्वर ४ स्थित बैतडी जिल्लाको सुर्नया गाउँपालिका–१ घर भई हाल गल्ली नम्वर ४ मा २७ वर्षकी कुमारी लक्ष्मी चन्दले संचालन गरेको बादशाह क्याफेबाट २ ग्राम ५१० मिलिग्राम लागूऔषध खैरो हेरोईन र २ ग्राम ५१० मिलिग्राम चरेशसहित निज लक्ष्मी चन्द र सोही ठाउँ बस्ने २६ वर्षकी लक्ष्मी सोनाहलाई शुक्रवार दिउँसो प्रहरीले पक्राउ गरेको हो।
यसैगरी बेलौरी नगरपालिका–१० सडकघाट पिपलचौताराबाट भीमदत्त नगरपालिका–४ गल्ली नम्वर १ महेन्द्रनगर बस्ने २९ वर्षीय अमित सिंह र दार्चुलाको लेकम गाउँपालिका–२ कैनडा बस्ने २० वर्षीय गोकुलदेब जोशीलाई २ ग्राम २७० मिलिग्राम लागूऔषध खैरो हेरोईनसहित शुक्रबार साँझ प्रहरीले पक्राउ गरेको हो।
म १ प १६०८ नम्बरको मोटरसाइकलमा सवार दुवै जनालाई भारतबाट नेपाल तर्फ आउदै गरेको अवस्थामा इलाका प्रहरी कार्यालय बेलडाँडी र प्रहरी चौकी भुडा, कञ्चनपुरबाट संयुक्त रुपमा खटिएको प्रहरी टोलीले चेकजाँच गर्दा उक्त पदार्थ फेला पारी मोटरसाइकलसहित दुवै जनालाई पक्राउ गरेको जनाएको छ।
