पूर्ण खोप सुनिश्चितताका लागि बैतडीमा घरधुरी सर्वेक्षण सुरु भएको छ । पुर्ण खोपयुक्त जिल्ला घोषणा अभियान अन्र्तगत जिल्लाका १० ओटै स्थानीय तहमा घरधुरी सर्वेक्षण थालिएको स्वास्थ्य कार्यालय बैतडीका प्रमुख योगेशप्रसाद भट्टले बताउनुभयो ।
राष्ट्रिय खोप तालिका अनुसार बालबालिकाहरुले खोप लगाए÷नलगाएको बारेमा जानकारी लिनका लागि नमूनागत रुपमा घरधुरी सर्वेक्षण गर्ने कार्य भईरहेको भट्टले बताउनुभयो । १० ओटा स्थानीय तहका तीनतीन वडाका कम्तिमा १५–१५ घरहरुमा सर्वेक्षण भईरहेको छ । १५ महिना देखि २ वर्ष उमेर समुहका बालबालिका रहेका घरलाई छनोटको दायरामा ल्याई सर्वेक्षणको काम भईरहेको छ ।
पालिकाहरुले यसअघि नै प्रत्येक घरमा घरधुरी सर्वेक्षण गरिसकेकाले सो कार्यलाई प्रमाणीकरण गर्नका लागि जिल्लाभरी घरधुरी सर्वेक्षण कार्य थालिएको हो । स्वास्थ्यकर्मी, खोप समन्वय समितिका पदाधिकारी, रेडक्रसकर्मी लगायतको सहभागितामा पूर्ण खोप सुनिश्चित गर्न घरधुरी सर्वेक्षण भईरहेको छ । सवेक्षणका क्रममा छुटेका बालबालिकालाई पुर्ण खोप दिई पुर्णखो सुनिश्चित जिल्ला घोषणा गर्ने कार्यक्रम रहेको भट्टको भनाई छ ।
