बैतडी,बैतडीमा दुव्र्यवहार गरेको भन्दै प्रधानाध्यापकलाई कालोमसो र जुताको माला लगाएको घटनामा प्रहरीले चार जनालाई पक्राउ गरेको छ । शिवनाथ गाउँपालिका–४ को पिपलकोट माध्यमिक विद्यालयका प्रधानाध्यापक दामोदर ओझामाथि कालोमोसो लगाएर सार्वजनिक रुपमा बेइज्जत गराएको भन्दै प्रहरीले महिलासहितका चार जनालाई पक्राउ गरेको हो ।
पक्राउ पर्नेमा ओझामाथि दुव्र्यवहार गरेको आरोप लगाउने ३८ वर्षीया महिला तारा महता, उनका श्रीमान प्रेम महता, मोहन महता र शकुन्तला महता रहेको सुदूरपश्चिमका प्रमुख प्रहरी नायब महानिरीक्षक(डीआईजी) ओमबहादुर रानाले जानकारी दिनुभयो ।
उनकाअनुसार चारै जनालाई इलाका प्रहरी कार्यालय मेलौलीबाट खटिएको टोलीले शुक्रबार दिउँसो घरबाटै पक्राउ गरेको हो । उनीहरुलाई अनुसन्धानका लागि जिल्ला प्रहरी कार्यालयको हिरासतमा राखिने प्रहरीले जनाएको छ ।
डीआईजी रानाले उनीहरुलाई कानुन बमोजिम कारवाही गरिने जानकारी दिनुभयो । महताको परिवारले प्रधानाध्यापक ओझामाथि कालोमोसो दल्दै जुताको माला लगाएर सार्वजनिक रुपमा बेइज्जत गरेका थिए । उनीहरुले ओझाको घाँटीमा म अपराधी हुँ भन्ने पम्प्लेट समेत हालेका थिए ।
तस्बिर सामाजिक सञ्जालमा सार्वजनिक भएपछि घटनाबारे प्रहरीले चासो राखेको थियो।
