काठमाडौं, भदौ २४ । कृषि तथा पशुपन्छी विकास मन्त्री रामनाथ अधिकारीले मन्त्री पदबाट राजीनामा दिनुभएकाे छ । मंगलबार बिहान एक सन्देश सार्वजनिक गर्दै उहाँले सरकारको ‘अलोकतान्त्रिक कदम’प्रति आपत्ति जनाउँदै पदत्यागको घोषणा गर्नुभएको हो ।
उहाँले राजीनामा सन्देशमा अभिव्यक्ति स्वतन्त्रतामाथि नियन्त्रण र युवापुस्तामाथि भएको दमनले आफूलाई ‘अपराधबोध’ भएको उल्लेख गर्नुभएको छ । ‘छोराछोरी पुस्ताले भ्रष्टाचार र अभिव्यक्ति स्वतन्त्रतामाथि नियन्त्रणको विरोध गर्दा उनीहरूमाथि भएको हत्या र दमनले लोकतन्त्र होइन, तानासाहीतर्फ देश धकेलिँदै गएको अनुभूति भयो,’ उहाँले लेख्नु भएकाे छ ।
साना कलिला छोराछोरीहरुको हत्या र दमन पश्चात् देश शोकाकुल बनेको अवस्थामा सरकारमा बसिरहनु आफ्नो नैतिकताको विपरीत हुने भएकाले राजीनामा दिने निर्णय गरेकाे उहाँले उल्लेख गर्नु भएकाे छ ।
उहाँले लोकतन्त्रमा प्रश्न सोध्नु र शान्तिपूर्ण विरोध गर्नु नागरिकको स्वाभाविक अधिकार भएको स्मरण गराउनुभएको छ । ‘जनताको जीवन र अभिव्यक्ति स्वतन्त्रताभन्दा माथि केही हुँदैन,’ उहाँले भन्नुभएको छ ।
