सबैले ख्याल गरेर चला
क्यालाइ गाणी झणन्नी बला
बचया मान्स सम्मान पाला
चानिमा टीका फुलकी माला
भुबाइ लैग्यो पछिग्युँ मुइत
नसोच्छु कभै हरौँनौ उइत
सारले चला जनझा ताणी
कोहिजन् चला पुरानी गाणी
बाटोलै कच्ची कारण छनी
बिगड्डो रोक्द्या घुमौँन्या पनि
रुप्याका लोप पणेर साथी
पुगाइ दिना मान्सुन माथी
झण्याका छन दिन् दिनै गाणी,
अकाल्मै मद्दा ओ कठै लाणी।
बिन्तीछ मेरि ओदाजु भाइ
नचला गाणी सराप खाइ
सिटहै बणि बस्याका हटा
चेकिन कणा गरनुँ बटा
झिक्कै पैंसा आउँना भणी
हालेर हिट्टा मानस बणि
चलुन्ज्या रोड नदिया ध्यान
सुद्दिको काल अकाल्मै ज्यान
कुरामा मस्त भुलेर पन
केइकेइ् गाणी झणन्या हन
कसैइ्त फुक्क निनले चेप्पो
कसैइ्त दैब माटिलै हेप्पो
कसैको ग्रह अदिन्या हुँनु
निक्कौइ काम गर्यालै रुँनु
आरम गरि चलुन गाणी
मान्सको ज्यान छकठै लाणी
चलाइ रख्दा रातरे दिन
झणन्या गाणी कारण यिन
पारस भट्ट (प्यासी)
मेलौली दुई बैतडी
