



-एक गौँमा हर्वा नाम गर्याको सरप्या थ्यो। तैका तीन चार घरवाली थिन् तो सराप खन्या ,जुवा तास खेल्या नौकरी चाकरी गर्याका रुप्या सब तसैमा उणाइ दिन्या महिनाकी तलपले नपुगीवर गाउँल्यान बठै रिनलै गाड्या ।गाउँल्यालै है है हर्वा नौकरी चाकरी वालो हो भणी जतिलै रिन दिदिन्या।महिनाइ तीस चालीस हजार तलप पचास साट हजार खर्च गरिरख्या तब एक रुप्या बच्यानाइ रिन्यानैको रिन तित्दा तिद्दा आपत पणिगै भौतुनैकात दिया। हर्वात कतिब रिनमा डुब्यो मान्स भ्योरे तैका घरलाई एक रिन्या आँजी आयो तैका रैछन् दस लाख माग्दा ए हर्वा भाइर आसैत !ओहो सेटौ नमस्कार भन्च हर्वा तै मान्सथाइ कि काम्ले आइथ्या? थोणा समस्या पणिरैथिरे सौँत जेइलै हन्थ्यारे भणन्ज्याइ हर्वा कुरणी काटन्छरे लौ सौँ जाइ जेइहन्छ भन्छत पारे बोराइनहै थोणा घोगा लैझा भन्छ अला मुइ अन्नपातै कुरणी नाइ पैरिउँरे रुप्यानकी कुरणी पैरिउँ सौँत जेइ हनान रे ब्याजैले दे आज काम चलुनौ भन्णाइ बटिन्ज्याँत तुइलेत कुरणी काटिहाले रुप्याइ माग्द आया हौ भणी मुइले जाण्याहुँ सेटौ आजत नाइ थिन थोणा तलप आइरैथिरे और मागिलैनिग्या। तो मान्स तातीग्यो अला मेरा कबहै दिन्या पारी कान्सी पुतारिका पेट गेदो लागिरैछ तो जन्म्या पछा नौकरी चाकरी वालो हौइझालोत दि हल्ला सेटौ तमरो नाइ खौँ ।अला हर्वा मुइ आज चाइर्यान काइहै खोजिदिनैब काहैं खोज्जु तमुइ खोज मुइ कोइनाइ दिन्याहन भन्णाइकी लाज हौइरैछ। नाइनाइ हर्वा जाँहैलै खोज्याहै खोज्ज हर्वा बोलन्छरे मुइ मुण्डो फोणुत पुइ? अला मुन्डो फोण्यात मरलैब मुइ पुइ कैखाइ मागलो रुप्या” हर्वा जोरले झोकिग्यो अन मुइ गरुँ कि पुइ स्वानी बेचुँत पुइ? बेच स्वानिलै मेरा रुप्या दिदे। हर्वा बोलन्छरे आब बेच जाँइ भणिहाल्यात तमुइ लैझा पुइ भणिदिछ मुइ क्यारुँ मेरा घर छनिछ।हर्वा बोलन्छरे मेरालै पारे दुइतिन आँजि छनिछन एक लैझा तमुइ क्यारुँबला मुइ अर्खाइ स्वानिले। बेच क्याइ भण्या पुइ? ओ लैझन्यावालो क्याद्याथ्यो अला हर्वा तोत रिसकी धाँतमा भणियाहो। हर्वा बोलन्छरे मुइलेलै रिसैकी धातँमा भण्याको हुँ ।हर्वाले रुप्या माग्द आयाकालाइ दिक्यायो दिक्यायोरे रिताइ घर फर्काइदियो।
पारस भट्ट (प्यासी) मेलौली दुई सुन्दर भुमी सेलि बैतडी
