बैतडी,
नावौं राष्ट्रिय खेलकुद प्रतियोगिताको लागि प्रदेशस्तरीय खुल्ला पुरुष क्रिकेट छनौटको उपाधी बैतडीले उचालेको छ । कञ्चनपुरलाई ३ विकेटले हराएर बैतडीले उपाधी उचालेको हो ।
आइतबार धनगढीमा सम्पन्न प्रदेशस्तरीय छनौट खेलको फाइनलमा कञ्चनपुरले दिएको ६३ रनको लक्ष बैतडीले ७ विकेट गुमाएर लक्ष पुरा गरेको हो ।
टस जितेर ब्याटिङ गरेको कञ्चनपुरले निर्धारित १२ ओभरमा ८ विकेटको क्षतीमा ६२ रन बनायो । कञ्चनपुरका दिपेश चन्दले ३२ रन बनाए । बैतडीका गजेन्द्र बोहरको ४ विकेट लिए । मौसम प्रतिकुलका कारण १२ ओभरमा खेलाइएको हो ।
६३ रनको विजयी लक्ष लिएर मैदान उत्रेको बैतडीले ११.५ ओभरमा ७ विकेट गुमाएर लक्ष भेट्टायो । बैतडीका लागि कप्तान बसन्त खत्रीले २४, खडक बोहराले १४, दिपक बोहराले १० बनाए ।
बैतडी बाजुरालाई हराएर फाइनलमा प्रवेश गरेको हो भने कञ्चनपुरले कैलालीलाई हराएर फाइनल प्रवेश गरेको हो ।
अब नवौं राष्ट्रिय खेलकुद प्रतियोगितामा सहभागी हुनका लागि सुदूरपश्चिम प्रदेशको टिम छनौट गरिने छ। नवौं राष्ट्रिय खेलकुद प्रतियोगिता अन्तरगतको क्रिकेट प्रतियोगिता भने भदौ २२ गतेबाट काठमाडौंमा हुने छ । प्रदेशस्तरीय छनौट खेलमा सहभागी टिमबाटै सुदूरपश्चिम प्रदेशको टोली छनौट हुनेछ।
